ම්ලේච්ඡ අවදියේදී එක් ජන කණ්ඩායමක් තව ජන කණ්ඩායමක් ආක්‍රමණය කර ඔවුන්ව සමූල ඝාතනය කර දැමුනා. තවත් විටක කාන්තාවන් තමන් සතු කරගෙන පිරිමින්ව මරා දැමුණා. කාන්තාවන් තමන් සතු කර ගැනීම සිදු වුණා. ක්‍රමයෙන් නිෂ්පාදන ක්‍රම වර්ධනය වෙද්දී ශ්‍රමයේ අවශ්‍යතාවක් උද්ගත වීම නිසා පසුව අක්‍රමණික ප්‍රදේශවල පිරිමි මරා නොදමා වහලුන් බවට පත් කර ගත්තා.
ප්‍රාථමික යුගයේ මාතෘ මූලික සමාජයක් පැවතුණාට එයින් කාන්තාවට අමුතුවෙන් අත් වූ සෙතක් නෑ. එය මුල්ම කාලයේ මුලු ගෝත්‍රයේම පිරිමින්ගේ කාම ගොදුර බවට පත් වුණා. ක්‍රමයෙන් සමාන ජාන නිසා විවිධ සංජානීය ආබාධ සහිත දරුවන් බිහිවෙන බව අවබෝධ කර ගැනීමත් එක්ක පියවරෙන් පියවර සීයලා, තාත්තලා, සහෝදරවරු මේ කාම ගොදුරු ක්‍රියාවෙන් අයින් වුණා.
නිෂ්පාදන බලවේග දියුණු වෙලා අතිරික්ත සම්පත් එක් රැස් වෙනකොට ඔන්න පිරිමියාට ඕනේ වුණා තමන්ගේම ලේ තියෙන දරුවෙකුට ඒ ධනය පවරන්න. නිල පතිනියක් පිරිමියාට ඕනේ වෙන්නේ ඒ අනුව. ඒත් ඔහුගේ බහු කාන්තා සේවනයේ අවශ්‍යතාව හේතුවෙන් ඔහු ගණිකා වෘත්තිය නිර්මාණය කළා. ඒ වගේම, ඔහුට කාන්තාව රිසි සේ සූරා කෑමේ අවශ්‍යතාව හේතුවෙන් විවිධ සංකල්ප ගොඩනගමින් ඒවා ප්‍රශ්න කළ නොහැකි පොදු සමාජ සම්මතයන් බවට පත් කළා. ගෝත්‍රික අදහස් දරන ජන සමූහ අදටත් කාන්තාව සලකන්නේ තමන්ට පරිහරණය කළ හැකි භාණ්ඩයක් ලෙස. ඔවුන්ගේ අඳින ඇඳුමේ සිට සිතන පතන දේ දක්වා සියල්ල සිරගත කර තිබෙනවා.
ඒ වගේම දියුණු ශිෂ්ට යැයි කියන සමාජයද ඔවුනට දෙවෙනි වන්නේ නෑ. ඔවුන් කාන්තා කාම වෙළඳපළක් නිර්මාණය කරමින් ඔවුන්ව රිසි සේ සූරාකෑම සහ තම මනෝ ව්‍යාධීන්ගේ ගොදුරු බවට පත් කර ගැනීමද සිදු කරනවා. ''කෲර ලිංගිකත්වය'', ''සමූහ ලිංගිකත්වය'' වැනි නූතන ක්‍රියාවන් ඊට නිදසුන්. යම් සමාජයක් කාන්තාව මුළුමනින්ම ආවරණය කරන්නේද එහි අර්ථය ඔවුන්ට කාන්තාව කාම භාණඩයකට වඩා දෙයක් නොවන බව. ඒ වගේම යම් සමාජයක් කාන්තාව වඩ වඩාත් නිරාවරණය කරන්නේද එහි අර්ථය ඔවුනට ව්‍යාජ නිදහසක් ලබා දෙමින් කාම භාණඩයක් බවට පත් කර ඇති බවයි.
මේ අනුව සමස්තයක් වශයෙන් ගත් විට අද වැදගත් ලෙස කතා කරමින් වැදගත් ලෙස අඳිමින් පළඳිමින් සිටින්නේද එදා සිටි ම්ලේච්ඡයාම බව ඉතා පැහැදිලිව පෙනී යනවා. මෙහි ඇති ශෝචනීය තත්වය අන් කිසිවක්වත් නෙවි. ම්ලේච්ඡයෙකුට, කවදාවත් ජීවිතයෙන් ලබන්න පුළුවන් අනන්ත අපරිමාණ සතුටෙන් බින්දුවක්වත් ලබන්න බැරි වීම. සතෙකුටත් වඩා අන්ත දුක්ඛිත තත්වයකින් ජීවිතය ගෙවා මිය යාම. ජීවිතයේ සතුට තියෙන්නේ කොතනද කියන එක අපි, '' ආශාවේ ආත්මාර්ථයේ සහ පරාර්ථයේ වෙනස'' යන ලිපියෙන් සාකච්ඡා කර තිබෙනවා.
No comments:
Post a Comment