ජීවිතය කියන්නේ මේකටද...?
ඔන්න මුලින්ම දරුවා නගරයේ ජනප්‍රිය පාසලකට දා ගන්නවා... ඊට පස්සේ 1 ශ්‍රේණියේ ඉඳන් ටියුෂන් යන්න පටන් ගන්නවා... ටිකක් ඇවිදින්න යන්න යාලුවෙක් ඇසුරු කරන්න, සෙල්ලම් කරන්න අවස්ථාවක් නෑ... ඒ විදියට ළමා කාලේ අහිමි වෙනවා... ඊට පස්සේ උසස් පෙළ සමත් වෙලා වෛද්‍යවරයෙක් වෙනවා... ඉහළ මධ්‍යම පන්තියට ඇතුලත් වෙන්න කියලා රෝහල් වෙලාවෙන් පස්සේ රෑ 8, 9 වෙනකම් චැනල් සේවය සපයනවා. ඊට පස්සේ ගෙදර ගිහින් නාලා කාලා නිදා ගන්නවා... හැම දිනක්ම ඔය විදියට ගත වෙලා යනවා.
අන්තිමේ විවේකය, වින්දනය, සතුට, සැනසීම නැති නිසා වෛද්‍යවරයාත් ලෙඩෙක් වෙනවා... ඉතින් ජීවිතයෙන් අපි ප්‍රාර්ථනා කරන්නේ මේ වගේ දෙයක්ද... අඩු වැඩියෙන් අද බොහෝ දෙනෙක්ට වෙන්නේ මේ ටිකයි...
ඒත් ගමේ ගොවිතැනක් බතක් කරගෙන ජීවත් වෙන දුප්පත් මනුස්සයෙක් ඇත්තටම මීට සාපේක්ෂව ගත්තාම ජීවිතය විඳිනවා... එයාට ඕනෙ තරම් විවේකය තියෙනවා... හරිත පරිසරයක ජීවත් වෙනවා... සොබා දහමේ චමත්කාරය විඳිනවා.... නිදහස තියෙනවා...
ඒ වගේම මිනිස් ජීවිතයකට නොගැලපෙන වෘත්තීන් ගණනාවක්මත් තියෙනවා... සමහර ඒවා සංස්කරණය කර ගන්න පුළුවන් මිනිසුන් මානව දයාවෙන් යුතුව සිතනවා නම්. නිදසුනක් විදියට පෞද්ගලික ආරක්ෂක සේවය කියන එක මිනිසත්කමට ගැලපෙන්නෙම නෑ... එයාට දවසේ කරන්න කියලා වැඩක් නෑ... ඔහේ බලන් ඉන්න තියෙන්නේ... ඒක මිනිසෙක්ට දෙන්න පුළුවන් ලොකුම වධයක්...
මිනිසෙක්ට ජීවිතේ සාරය අත්වෙන්න නම් තමන්ගේ ශ්‍රමය වැය කරලා සම්පූර්ණ නිෂ්පාදනයකට දායක වෙන්න ලැබෙන්න ඕන... ඒත් මේ වෙනකොට ලාභය සහ නිෂ්පාදිතයේ පමණක් ඵලදායිතාවය අපේක්ෂා කිරීම නිසා අද පුද්ගලයෙක්ට එහෙම අවස්ථාවක් නෑ... ඔහු හෝ ඇය දායක වෙන්නේ නිෂ්පාදිතයේ කුඩා කොටසකට... ගාමන්ට් එකක කොලර් එකක්, කමිස අත සිය දහස් ගාණක් මැෂින් එකක් වගේ මහන කෙනාට අත්වෙන තෘප්තිය මොකක්ද.... පීඩාව සහ අතෘප්තිය විතරයි...
මිනිසුන්ට ජීවිතයක් අත්පත් වෙන්න ඕනේ කියලා හිතුවා නම් කෙරෙන්නේ මහන මැෂින් තාක්ෂනය තව ටිකක් දියුණු කරලා ඒවා නිවෙස්වලටම දීලා නිවසේදීම සම්පූර්ණ ඇඳුමක් මහන්න සලස්වන එක.
මිනිස්සු කාර්යක්ෂමව වැඩ කරනවා නම් පැය 8ක් තුළ කරන වැඩ ඉන් අඩක වගේ කාලයක් තුළ කරන්න පුළුවන්. ඉතින් එහෙම වෙනවා නම් මිනිසුන්ට හවස 2 වගේ වෙද්දි ගෙදර යන්න අවස්ථාව සලසා දෙන්න පුලුවන්... එතකොට දවසේ වේලාව බෙදලා සවස් සහ රාත්‍රී සේවා අවශ්‍ය වෙන සේවා වලට වෙන වෙනම සේවකයන් යොදවන්න පුළුවන්. එතකොට කෙනෙක්ට නගරයේ සේවය කළත් ගෙදර ගිහින් ජීවිතය ගත කරන්න ප්‍රමාණවත් වේලාවක් ලැබෙනවා...
No comments:
Post a Comment